जरा जरा

न तू कधीच बोलता कळायचे जरा जरा
तुझे कटाक्ष सारखे छळायचे जरा जरा

खळी कपोल गोड गोड लाजणे मधाळसे
म्हणे, नभात चांदणे जळायचे जरा जरा

उठे हळूच पापणी फुटे मनात तांबडे
मिटे तसे; अरूण मावळायचे जरा जरा
(मऊ उन्हात मेघही गळायचे जरा जरा)

मिठास भासते सखे मिठातही अता मला
मिठीत मोक्षसौख्य ते मिळायचे जरा जरा

फुटायची जळात लाट केस ते तुझे तसे
ललाटभाग झाकूनी रुळायचे जरा जरा

तहान चातकासही हवीहवीच वाटते
ढगात पाहण्या तुला पळायचे जरा जरा

रती परी विलोभनीय सुंदरी तु कामिनी
तुला बघून बुद्धही चळायचे जरा जरा

उडे हवेत ओढणी विवेक ढासळायचा
अशा क्षणास ध्रूवही ढळायचे जरा जरा
==================
सारंग भणगे (२१ मे २०११)