स्मृती

तुझ्या मौनातल्या संवेदनांनी गूज सांगावे
असे माझ्या मनाशी तू करावे गूढ कांगावे

कुणी बोलायला नाही कुणी ऐकायला नाही
असा मी एकटा आहे, तरी एकांत हा नाही
मला भेटावया येती स्मृतींचे नित्य सांगावे

तिन्ही सांजेस होता मी जरासा शांत सामुद्री
घुमे आलाप गाजेचा तुझ्याशी लागते तंद्री
अशा वेळेस शब्दांनी मुक्याने आत रांगावे

स्मृतींचे दीप निर्मोही मनाने लावतो आहे
मनाच्या वाहत्या पाण्यामध्ये ते सोडतो आहे
प्रभेने त्या वियोगाच्या तमाने दूर पांगावे
======================
सारंग भणगे (७ नोव्हेंबर २०१७)