मी पोहत पोहत गेलो ती वहात वहात गेली
मी अंतर कापत गेलो ती निवांत नहात गेली
मी खोलीत रहात होतो
ती खोलात रहात होती
मी सुखात दु:खी होतो
ती दु:खात सुखी होती
मी वाटेत पहात गेलो, ती वाट पहात गेली
मी अंतर कापत गेलो ती निवांत नहात गेली
मी बाहेर शोधत होतो
ती माझ्याच आत होती
मी तिला आळवित होतो
ती मलाच गात होती
मी तिच्यात बुडून गेलो ती मला तारून गेली
मी अंतर कापत गेलो ती निवांत नहात गेली
========================
सारंग भणगे (२६ नोव्हेंबर २०१८)
