बाहुपाशी घे मला

बाहुपाशी घे मला होऊनी तू शिंपला,
जोखडात प्रीतीच्या वृषभराज जुंपला,
तनु रणात या जणू शाल्व-शंख फुंकला,
ऋण तरुण रात्रीचे फेडता तू जिंकला.

करू गुन्हा रे सख्या पुन: पुन्हा सारखा,
मिलनात माझिया स्वत:स हो तू पारखा,
च-हाट चालू दे तुझे; चालू दे हा चरखा,
नकोत ऋतू मास नि नकोत वार तारखा.

देह हा जणू कळी, हरेक वेच पाकळी,
होऊनी भुजंग तू कवळून घे हि कर्दळी,
माझिया गळ्यातली अतूट हो तू साखळी,
श्वास होऊनी सख्या भरून टाक पोकळी.
------------------------------------------------
सारंग भणगे. (१८ जुलै २०१२)