सोसले तू भोगले मी

 

सोसले तू भोगले मी

पेटला तू पोळले मी II

भाकरीसाठी उपाशी

राबला तू रापला,
भाकरीला भाजताना
हात माझे
..............भाजले मी II१II

पोट झाडाचे भराया

तू स्वत:ला गाडले,
खोड-फांद्यांच्या उरीचे
घाव निर्दय
................झेलले मी II२II

पावले थकली तरीही

तू पुढे चालायचा,
ज्या ठिकाणी थांबला तू
त्यापुढे रे
...................चालले मी II३II

पाहिले आभाळ तेव्हा

तू दिले झोके सुखे,
तू मला, अन त्या नभाला,
सावरूनी
............घेतले मी II४II

देत गेला तू मलाही

घेतले नाही कधी,
तू दिलेल्या आसवांना
पाजले तू
..............प्यायले मी II५II
===================
सारंग भणगे (२६ नोव्हेंबर २०१३)