गाणे गात फिरावे

आकाशातून भिरभिरणारे गाणे गात फिरावे
दरीदरीतून दुमदुमणारे गाणे गात फिरावे

शांत तळ्याच्या गालावरती वलये उठवीत जाऊ
जलथेंबांच्या तालावरती नाचून थोडे पाहू
पानावरती टपटपणारे गाणे गात फिरावे

गवतावरती गोंडस बोंडे गवतफुलाची तोंडे
कशी शाल्मली हृदयामध्ये जपते कापूसगोंडे
तृणपात्यातून हुळहुळणारे गाणे गात फिरावे

छाती फाडून दुर्गकड्याची वाहे झुळझुळ पाणी
गोड गळ्याने निर्झर गाती निर्मळ मंजुळ गाणी
नदीकाठातून खळखळणारे गाणे गात फिरावे

तलम धुक्याचे गर्द रेशमी पडदे सारून थोडे
क्षितिजावरती सूर्य सोडवी अंधाराचे कोडे
सांज नभाशी कुजबुजणारे गाणे गात फिरावे

ओढ लावते संध्या तिजला गाऊ तरल तराणे
गाढ झोपल्या रात्रीसाठी अंगाईचे गाणे
चांदण रात्री लुकलुकणारे गाणे गात फिरावे
-------------------------------------------------------
सारंग भणगे. (२९ जानेवारी २०१५)