तू आहेस....

तू नाहीस माझ्या हृदयावरती गोंदलेली नश्वर
तू आहेस माझ्या प्राणावरती कोरलेली अक्षर

तुला भेटणे शक्य जरी पण क्षितिजावरतीच फक्त
तू आहेस माझ्या खांद्यावरती झोपलेलं अंबर

नौका'नयना' करिता येती तुझ्याचपाशी दोघे
तू आहेस माझ्या डोळ्यामध्ये बांधलेलं बंदर

पिऊन लाटा डोळ्यांमधल्या खारट चुंबन मिळते
तू आहेस माझ्या ओठांनीही चाखलेला सागर

तुझ्या नेणिवा भेटत गेल्या स्वतःस खोदत जाता
तू आहेस माझ्या अस्तित्वाला जोडलेलं अस्तर

--
सारंग भणगे