जीवना

फार झाल्या जीवनाच्या यातना
तू विजेता हारलो मी जीवना

भारताच्या संस्कृतीची थोरवी

भूतकाळाच्याच साऱ्या वल्गना

काय डोळे हे इशारे बोलती

ओठ थोडे खोलुनी तू सांग ना

दूर ती गेली तरी ना एकटा

आज माझ्या संगतीला वेदना

जिद्द आहे जिंकण्याची; याहुनी

दैव देते कोणतीही साथ ना

नित्य नेमे पाहतो फोटो तुझा

ही नसे का दिव्य माझी साधना!

वादळा धावून ये तू अंगणी

मी उभा दारी तुझी जा खैर ना
===================
सारंग भणगे. (१९ जून २०१२)