माय मराठी

चल ऊठ मराठी वीरा
साद घालतो तव वीर्या,
हनुमानाचा वंशज बनुनी
घे झेप ग्रास त्या सुर्या.

शालिवाहन आठवे शूर
घे शपथ त्या शिवबाची,
परशुरामाची घे तु छाती
अन दीक्षा ज्ञानोबाची.

उत्तुंग असू दे आशा
घे ध्येयाची भरारी,
शत्रु कुणी अडवा येता
दे झुंज कडवी करारी.

इतिहास तुझ्या हा पाठी
भवितव्याचा घेऊनी वेध,
गा अभिनव उज्वल गाने
नि नवसृजनाचे तू वेद.

गे माय मराठी माये
जिंकून घे त्रैलोक्याला,
हा समर्पित शिलेदार
मराठी तव ऐक्याला.
===========
सारंग भणगे. (२७ फेब्रुवारी २०११)