प्राण आतुरले सखी

तुला पाहण्यासाठी प्राण आतुरले सखी,
माझ्या स्वप्नांची ही भूमी झाली गं आता सुकी.


तारकांनी फुललेले नभ आता रूखे वाटे,
पौर्णिमेच्या रात्रिही मनि अंधार दाटे.
दैन्य सा-या रात्रीवरती, माझे मनही दु:खी.
माझ्या स्वप्नांची ही भूमी झाली गं आता सुकी.


तुझ्या धुंद श्वासांचा गंध फुलात नाही,
तुझ्या कोमल स्पर्शाचा आनंद रेशमात नाही.
तुझ्याविना माझ्या ह्रुदयी वैराग्य केवळ बाकी.
माझ्या स्वप्नांची ही भूमी झाली गं आता सुकी.


बहरला वसंत असता पानझडी मला भासे,
रविकराच्या गर्भात मला काळोखाचे मूल दिसे.
तू नसता जीवनाची रंगत झाली फिकी.
माझ्या स्वप्नांची ही भूमी झाली गं आता सुकी.
=====================
सारंग भणगे. (१९९३)