जरा वेगळे वाटते

तुझ्या अंतरी वाहणे जरा वेगळे वाटते,

तुझ्या वाचुनी राहणे जरा वेगळे वाटते.

 

जरी चुंबनाची अवीट गोडी; तरी त्याहुनी,

कटाक्षातळी नाहणे जरा वेगळे वाटते.

 

जरासे कुठे बांधता कसा जीव व्याकूळतो,

मिठीला तुझ्या साहणे जरा वेगळे वाटते.

 

तसे पाहता माणसे जरी पाहती आरसे,

तुला आरसा पाहणे जरा वेगळे वाटते.

 

अशी सुंदरी मोहिनी तुझी चाह साऱ्या जगा,

सखे तू मला चाहणे जरा वेगळे वाटते.

--
सारंग भणगे (१२ फेब्रुवारी २०१२)