माझे सर्वस्व तू.

नक्षत्रात होतीस तू; मी तुझ्या वक्षात गं,
पौर्णीमेचा चंद्र माझ्या ओंजळीत साक्षात गं।

निरागस बालकाच्या होतीस तू हास्यात गं,
सर्वस्व माझे ओतले मी तुझ्या दास्यात गं।

निर्झराच्या होतीस तू झुळझुळ पाण्यात गं,
मधुमग्न भामराच्या रुणझुण गाण्यात गं।

गानधुंद गायकाच्या होतीस तू सुरात गं,
पुष्पकोशी दाटलेल्या मकरंदी पुरात गं।

प्रजापतीचा होतीस तू पहिलाच हुंकार गं,
सृजनाचे आद्य अक्षर तू अनाहत ओंकार गं.