ओळखलेस का तू मला?

गालांवरच्या खळ्या पाहता; गुलाबकळ्या उमलत हृदयी,

भाळावरच्या बटा उडवी; मोहक किती तुझ्या सवयी।

दुरुना येता तुज पाहता; भिरभिरती फुलपाखरे,

डुलू लागत कळ्याफ़ुले; अवघ्या वल्लरी वृक्ष सारे।

स्पर्शून येई समीर तुजला; तुटतुटे काळजाचे धागे,

तुझ्या स्मृतींच्या हिन्दोळ्यावर; काळ धावतो उगाच मागे।

आज आकस्मिक अशी भेटता; आठवणीन्चा गवाक्ष खुलला,

कशी निर्दया पुसतेस मज; "ओळखलेस का तू मला?"।

कल्लोळ मनाचा दावू कसा; मनी गुंफतो वधूमाला,

पाहून तव गळ्यास पुसतो; "ओळखलेस का(?) तू मला?"